Xuan Bello, ún de los autores más destacaos de les lletres asturianes, ganó’l Premiu de Poesía Teodoro Cuesta na so XXVII edición. El so poemariu, tituláu Les isles inciertes, presentáu col seudónimo Mark Aliello, foi l’escoyíu pol xuráu’l pasáu día 1 d’avientu tres la llectura de los 19 orixinales presentaos al que ye’l premiu de poesía más prestixosu de los que se convoquen n’Asturies. El xuráu formáronlu Ángeles Carbajal, Marta Mori, Lourdes Álvarez, Ana Isabel Medina y Ánxel Álvarez Llano, actuando como presidente Faustino Zapico y como secretariu Ismael G. Arias, dambos ensin voz nin votu. Tres delles rondes de delliberación, quedaron finalistes los poemarios Allumamientu y Les isles inciertes, decidiendo’l xuráu por mayoría otorgar el premiu a esti últimu; l’autor resultó ser Xuan Bello.

El Premiu Teodoro Cuesta creóse nel añu 1991 y considérase’l más prestixosu de los que se convoquen n’Asturies nel ámbitu de la poesía. Ente los sos ganadores figuren los más reconocíos autores del Surdimientu. Precisamente Xuan Bello yá ganare’l premiu en 1993 col poemariu tituláu El llibru vieyu.

  COMPARTIR:
Share on FacebookTweet about this on TwitterShare on Google+Pin on PinterestEmail this to someonePrint this page