Fiestes patronales de Mieres, que tán baxo l’advocación relixosa de San Xuan Bautista. Ye la folixa más importante del conceyu y el día grande ye’l 24 de xunu.
Na nueche de San Xuan hai munches lleendes vinculaes col solsticiu del branu: fálase de xanes, cuélebres, trasgos, busgosos, encantamientos y embruxamientos. Too esto ta en rellación col cultu yá antiguu al mediu natural, al agua y al fueu. Paez ser que ye una tradición d’heriedu célticu, matizada poles corrientes romanu-cristianes. Coses como la danza prima o la foguera, que sigún dalgunos estudiosos proceden de la edá de fierru, ponen de manifiestu la antigüedá d’estes celebraciones.
El día de San Xuan ye’l momentu de los ritos máxicos. Enrámense les fontes del cascu urbanu y ye’l día nel que se fai la cargüeñá, elementu mui vistosu y recuperáu nun fai muncho y que ye la escenificación de cómo se facía antaño l’acarretamientu de lleña y de trapos vieyos pa quemar na foguera, allugada güei na Plaza del Ayuntamientu. A les doce la nueche préndese la foguera y depués la xente bailla en círculu al rodiu del fueu, garraos pelos meñiques y cantando¿hai un galán nesta villa¿.
La folixa dura una selmana yá qu´’hai un perbonu calendariu festivu nel que se desenrollen delles actividaes: conciertos nel parque Xovellanos, festival de mases corales, música na cai, desfiles folclóricos y xigantes y cabezudos, ente otres coses. La fiesta fina’l día de la Xira de San Xuan que se fai na vera izquierda del ríu Caudal, a la altura d’El Pedroso.
Nestos díes tamién hai delles actividaes deportives y culturales entamaes por clubes y entidaes del Conceyu que se sumen al programa festivu.
¡Nengún foriatu se siente estrañu nestos díes en Mieres!
