Daniel García Granda resultó ganador del Premiu Teodoro Cuesta na so XXXIV edición. El xuráu, reuníu ayer miércoles, escoyó esti poemariu ente los 24 presentaos, destacando “el ritmu, l’usu con procuru del idioma y la capacidá d’emocionar, asina como la posibilidá de topar la guapura na sutileza universal del instante que se proyecta nos versos y poemes. “En resume, un diálogu cola lliteratura y l’arte como ficieran Ana Blandiana, Cohen…”.
El xuráu tuvo formáu por María Fernández Abril, Alfredo Garay Menéndez, Pablo Rodríguez Medina, Rafel Rodríguez Valdés y Lluisa Suárez Sanz, actuando como presidenta la conceyala Belén Alonso Losa y como secretaria Elena Losa Carballido.
El Premiu Teodoro Cuesta, dotáu con 4.000 euros, creóse nel añu 1991 y considérase’l más prestixosu de los que se convoquen n’Asturies nel ámbitu la poesía, contando nel so palmarés con autores de prestixu de les lletres asturianes como Berta Piñán, Vanessa Gutiérrez, Xuan Bello o Lourdes Álvarez. Nomes a los qu’agora s’amiesta Daniel García Granda, natural de La Pola, Siero, y profesor d’Inglés nel Institutu Bernaldo de Quirós. García Granda tien publicaos cuatro llibros de poesía n’asturianu y varies traducciones y publicaciones en castellán.
